വിഴിഞ്ഞം: കാർ സ്കൂട്ടറിൽ ഇടിച്ച് സ്കൂട്ടർ യാത്രികനായ എംവിഡി ഉദ്യോഗസ്ഥൻ മരിച്ചു. പെരിങ്ങമ്മല സാഫല്യത്തിൽ മധു സുകുമാരൻ (48) ആണ് മരിച്ചത്.
ഇന്നലെ രാത്രി ഏഴരയോടെ ബാലരാമപുരം ഉച്ചക്കട സിസിലിപുരത്തിന് സമീപത്തെ അക്വേറിയത്തിനടുത്തായിരുന്നു അപകടം. ബാലരാമപുരം ഭാഗത്ത് നിന്ന് വരികയായിരുന്ന കാർ ഉച്ചക്കട ഭാഗത്ത് നിന്ന് വരികയായിരുന്ന സ്കൂട്ടറിൽ ഇടിക്കുകയായിരുന്നു. റോഡിൽ തെറിച്ച് വീണ് തലക്ക് ഗുരുതരമായി പരിക്കേറ്റ മധുവിനെമെഡിക്കൽ കോളേജ് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
മോട്ടോർ ട്രാൻസ്പോർട്ട് കമ്മിഷണർ ഓഫീസിലെ ടൈപ്പിസ്റ്റാണ് ഇയാൾ. ഭാര്യ: സൗമ്യ. മൃതദേഹം മെഡിക്കൽ കോളജ് മോർച്ചറിയിൽ. വിഴിഞ്ഞം പോലീസ് കേസെടുത്തു.